تلویزیون ملی أفغانستان که تحت کنترول اداره طالبان فعالیت دارد، امروز پنج شنبه گزارش داده است که محمد اسماعیل غزنوی، والی اداره طالبان در بدخشان در رأس هیئتی به تاجیکستان رفت و با مقام‌های این کشور گفت‌وگو کرده است.

اینستاگرام دویچه وله دری را دنبال کنید

عابدالله عقاب فاروقی، سخنگوی ریاست عمومی پولیس سرحدی اداره طالبان گفته است که این هیئت با  والی کوهستان بدخشان تاجیکستان،  معاون امنیت ملی سرحدات و دیگر مقام‌های امنیتی این کشور دیدار کرده و درباره‌تقویت نظم بندرها و هماهنگی سرحدی گفت‌وگو کرده است.

جزئیات بیشتری درباره این سفر منتشر نشده است و  مقام‌های تاجیکستانی نیز تاکنون در این باره چیزی نگفته اند.

هفته پیش هیئتی از تاجیکستان نیز به کابل سفر کرده و با  مقام‌های طالبان درباره‌تقویت و گسترش مناسبات و همکاری‌های اقتصادی گفت‌وگو کرد.

یوتیوب دویچه وله دری را ببینید

این نخستین سفر مقام‌های تاجیکستان به افغانستان و اداره طالبان به تاجیکستان پس از بازگشت طالبان به قدرت در چهار سال گذشته است. تاجیکستان تا کنون اداره طالبان را به‌رسمیت نشناخته است و ارتباط نزدیکی با این گروه نداشته است.

مقام های تاجیکستان همواره در نشست های گوناگون درباره‌ فعالیت گروه‌های تروریستی و قاچاق مواد مخدر در شمال افغانستان ابراز نگرانی کرده است.

تاجیکستان  میزبان جریان‌ها و جبهه‌های مخالف طالبان، از جمله  جبهه مقاومت ملی به رهبری احمد مسعود است که در شهر دوشنبه دفاتر رسمی دارند. سفارت افغانستان در دوشنبه در این چهارسال از سوی سفیرحکومت پیشین اداره می شود.