وزارت خارجه اداره طالبان  روز سه‌شنبه در خبرنامه‌ای اعلام کرد که امیرخان متقی و همتای تاجیکستانی‌اش سراج‌الدین مهرالدین در یک تماس تلفنی درباره روابط سیاسی، همکاری‌های اقتصادی، وضعیت مرزی، هماهنگی امنیتی و ابتکارات منطقه‌ای گفت‌وگو کردند.

این گفت‌وگو چند روز پس از کشته شدن پنج شهروند چینی  در مناطق مرزی  تاجیکستان با افغانستان صورت گرفته است.

مقام‌های تاجیکستان  روز دوشنبه گزارش دادند که در دو حمله‌ای که در روزهای جمعه و یک شنبه از خاک افغانستان صورت گرفته، پنج شهروند چینی کشته و پنج تن دیگر زخمی شده‌اند.

بر اساس اعلامیه وزارت خارجه طالبان، امیرخان متقی رویدادهای امنیتی اخیر در خاک تاجیکستان و کشته و زخمی شدن اتباع چینی را محکوم کرده و آن را تأسف‌بار خوانده است. او همچنین بر اهمیت همکاری‌های مشترک برای تأمین ثبات منطقه تأکید کرده است.

وزارت خارجه طالبان بدون این که از گروه مشخصی نام ببرد، در این اعلامیه گفت است که بر اساس ارزیابی ابتدایی، «در این رویداد حلقاتی دست دارند که برای ایجاد آشوب، بی‌ثباتی و دامن زدن به بی‌اعتمادی میان کشورهای منطقه تلاش می‌کنند.»

 وزیر خارجه طالبان افزوده است که افغانستان و تاجیکستان اخیراً فضای اعتماد برای همکاری‌های سیاسی، اقتصادی و امنیتی ایجاد کرده‌اند، اما این حلقات می‌کوشند این روند را تخریب کنند.

وزارت امور خارجه طالبان  در این گفتگو بر تامین امنیت مرزها و انجام تحقیقات مشترک آعلام آمادگی کرده اما گفته است که اقدامات مشترک علیه «عناصر مخرب» نیاز به زمان دارد.

در بخشی از این اعلامیه آمده است: «حکومت افغانستان به حکومت تاجیکستان از همکاری همه‌جانبه در این زمینه اطمینان کامل می‌دهد و جهت شناسایی عوامل این رویداد، آمادگی کامل برای تبادل اطلاعات، همکاری تخنیکی و ارزیابی مشترک دارد.»

به دنبال این رویداد سفارت چین در شهر دوشنبه از شرکت‌ها و کارمندان شرکت‌های چینی خواست که فوراَ مناطق مرزی تاجیکستان با افغانستان را ترک کنند.

تاجیکستان و طالبان مناسبات دیپلماتیک ایجاد می‌کنند؟

تاجیکستان تنها همسایه  افغانستان  است که مناسبات رسمی دیپلماتیک با طالبان ایجاد نکرده است، اما تماس‌ها میان دو جانب اخیراَ افزایش یافته است.

ماه گذشته برای نخستین بار پس از بازگشت طالبان به قدرت در چهار سال گذشته،یک هیئت دولتی تاجیکستان  به کابل سفر کرد. همچنین مقام‌های ولایتی اداره طالبان نیز به تاجیکستان سفر داشته اند.

مقر اصلی «جبهه مقاومت ملی» به رهبری احمد مسعود در تاجیکستان مستقر است. سفارت افغانستان در دوشنبه طی این چهار سال همچنان از سوی سفیر حکومت پیشین اداره می‌شود.