'Yar tsohon shugaban Afirka ta Kudu Jacob Zuma ta yi murabus daga majalisar dokoki sakamakon zarginta da ake da dibar 'yan kasa aikin tsaro don su yi wa Rasha yaki a kasar Ukraine. A wani taron maneman labarai da ya gudanar a birnin Durban, darektan jam'iyyar MK da mahaifinta ya kafa, ya sanar cewar Duduzile Zuma-Sambudla za ta ba da cikakken hadin kai ga binciken da hukumomin da abin ya shafa ke gudanarwa.

Duduzile Zuma-Sambudla da mahaifinta Jacob Zuma da suka halarci taron manema labarai ba su yi wani jawabi. Amma 'yar uwarta ta zarge ta a makon da ya gabata da marar hannu a daukar 'yan Afirka ta Kudu 17 aikin tsaro, wadanda suka yi kira ga Shugaba Cyril Ramaphosa da ya fitar da su daga halin da suke cikia a yankin Donbas na Ukraine.

Karin bayani: Zaben Afrika ta Kudu: Zuma ya daukaka kara

Fadar mulki ta Kyiv ta ba da rahoton cewa an gano mayaka 1.426 da suka fito daga kasashen Afirka 36 a cikin jerin bakin da Rasha ke amfani da su a fagen yaki a Ukraine.

 An zabi Duduzile Zuma-Sambudla a majalisar dokokin Afirka ta Kudu ne a watan Yunin 2024, amma tana fuskantar tuhumar tayar da tarzomar da ta barke bayan da aka kama mahaifinta saboda kin bayar da shaida a shari'ar cin hanci da rashawa da ake yi masa, lamarin da ya yi sanadiyyar mutuwar mutane sama da 350.