Al-Bashir ya kafa gwamnatin hadin kan kasa
May 12, 2017![Omar al-Bashir Archivbild 2012](https://static.dw.com/image/17343109_800.webp)
Shugaba Omar Hassan Al-Bashir ya ce wannan sabuwar gwamnatin hadin kan kasar da ya sanar da kafawa, ita ce matashiya ga tabbatar da adalci da zaman lafiya mai dorewar da 'yan kasar suka jima suna fatan gani
"Gamsuwar da muka yi da cewa hadin kan 'yan kasa da zaman lafiya mai dorewa, ba za su samu ba sai da hadin kai da aiki tare tsakanin illahirin jam'iyyun siyasa da bangarori mabanbanta na 'yan kasa, shi ne ya tilasta mana kafa wannan gwamnatin hadin kan kasa, muna fata sauran masu kishin kasa da ke dari dari za su mu tafi tare dasu.”
Sabuwar gwamnatin da ta kunshi Hasbu Muhammad Abdurrahman a matsayin mataimakin shugaban kasa da Bakri Hassan Saleh a kan kujerar Firaiminista da kuma jagororin adawa a matsayin masu bai wa shugaba shawara, a wannan juma'ar ce a ke sa ran za ta yi rantsuwar kama aiki.
Shugaban jam'iyya mai mulki a kasar, Ibraheem Mahmud Hamed ya ce, wannan gwamnatin ta ci sunanta ta hadin kan kasa.
"Jam'iyya mai mulki ta saryantar da hakkinta na mamaye madafun iko kamar yadda kundin tsarin mulki ya tanadar, a matsayinta na jam'iyyar da ta lashe galibin zabe. Tun daga ministoci da masu ba da shawara da gwamnoni, duk mun saryantar don kishin kasa da neman hadin kai.”
A yayin da galibin 'yan kasar ke maraba da sabuwar hukumar, su kuwa 'yan adawar da suka kauracewa taron kasar da aka karkare bara, cewa suke da ma sun san za a rina.
"Aiwatar da yarjejeniyar da aka cimma a taron kasa bil hakki, shi ne mafita ga rikicin kasar Sudan, ba sassakewa masu rike da mukamai wuraren zama, in ba haka ba, to ina amfanin taron kasar da aka share shekaru ana yi? idan ba za a aiwatar dashi ba sau da kafa ba.”
A kasar ta Sudan da ke da jam'iyyun siyasa da kungiyoyi masu dauke da makamai fiye da 100, masharhanta na ganin zai yi wuya a kafa kowace irin gwamnati ba tare da wasu sun yi korafin ganin an mayar da su saniyar ware ba. Ko da yake, masharhantan sun yi amannar cewa, rage kashe kudi kan sayen makamai da gudanar da ayyukan gwamnati zai iya yin tasiri matuka ga halin kuncin rayuwar da y'an kasar ke fama da shi, fiye da daukin iko tsakanin jagororin mayakan sa kai da shuwagabannin siyasa.