Amirka na shirin janye dakarunta daga Nijar
April 20, 2024![Amirka na shirin janye dakarunta daga Nijar](https://static.dw.com/image/68876931_800.webp)
Jami'an kasar Amirka sun ce sun amince da bukatar majalisar mulkin soji ta Nijar na janye dakarunsu fiye da 1,000 daga kasar. Jami'an da suka nemi a sakaya sunansu sun bayyana hakan ne gabanin a fitar da sanarwar a hukumance.
A makon gobe ne dai ake sa ran tawagar Amirkar ta kai ziyara birnin Yammai, a wani mataki da ake ganin za su yi amfani da wannan damar ce wajen shiryawa da kuma tsara yadda dakarun za su fice daga kasar.
Karin bayani: Fara janye dakarun Faransa
Ana dai ganin matakin da aka dade ana tsamanni ya kara bai wa Rasha daman samun karin fada a ji a yankin.
A watan Maris din da ya gabata ne dai, Sojojin da ke mulki a Nijar suka soke yarjejeniyar soji da ke tsakaninsu da Amirka tare da mika bukatar ficewar dakarun kasar.
A karkashin yarjejeniyar da kasashen biyu suka kulla, dakarun Amirka da ke hamada na amfani da jiragen sama marasa matuka wajen yakar kungiyoyin da ke gwagwarmaya da makamai a yankin yammacin Afirka.