Amirka za ta fara amfani da rigakafin COVID-19 a cikin watan Disemba mai kamawa. Hukumomin lafiyar kasar sun yanke wannan shawarar ce a daidai lokacin da annobar ke kara hallaka al'umma a kasar.

Kasashe masu karfin tattalin arziki a duniya dai na da tabbacin samun allurar a kan kari, sai dai shugabar gwamnatin Jamus Angela Markel ta bayyana damuwa kan samun maganin ga kasashe matalauta. Merkel ta yi kiran hada karfi wuri guda domin samar da maganin a ko'ina a duniya.

Shugabar gwamnatin ta Jamus ta ce duk da alkawarin shugabannin kungiyar kasashe masu arzikin masana'antu na duniya G20 kan wadatar da maganin na Corona har yanzu ba a cimma wata yarjejeniya ba a hukumance.

Taron na G20 da aka kammala a ranar lahadi ya tabo batutuwa da dama da suka hada da saukakawa kasashe masu tasowa bashin da ya yi musu katutu da kuma batun makomar kasashen Afirka.