Sabbin takunkumin sun shafi fiye da mutane 30, da hukumomi da jiragen ruwan dakon kaya da ake zargin su na taimakawa siyan mai ba bisa ka'ida ba, da kuma harkokin kera makamai na Iran. Trump ya sha yin barazanar kai hari idan Iran ba ta cimma yarjejeniya kan shirin nukiliyarta ba.

A gefe guda, Iran ta mayar da martani ta na sukar maganganun shugaban Amurka, daga kiran su karya tsagwaronta zuwa nuna cewa tattaunawar na iya kawo yarjejeniya ta hanyar diflomasiyya

Wannan na zuwa ne a daidai lokacin da Amurka ke tura jiragen sama da na ruwa mafi yawa zuwa Gabas ta Tsakiya cikin shekaru da dama, yayin da Iran ke fama da sabuwar zanga-zangar lumana da rikice-rikice a cikin gida bayan zanga zangar gama gari a watan da ya gabata.