Kakakin hukumar na UNICEF James Elder ya shaida wa manema labarai a Geneva cewar, idan babu isasshen man fetur, ayyukan tsaftar muhalli za su  ruguje. Akwai kuma barazanar kamuwa da cutar amai da gudawa a yankin na zirin Gaza inda jama'a suka cika asibitoci makil da masu jinya.

Yanzu haka dai an fara kwashe majinyata a asibitin al-Shifa, wanda shi ne mafi girma a Gaza. Yayin da  wasu asibitoci biyu da ke arewacin Gazan asibitin Indonesiya da kuma asibitin Ahli Arab, suma suka bukaci taimako daga hukumar lafiya ta duniya domin saukaka kwashe mutanen.