Tattaunawar sa'o'i biyar tsakanin Shugaban Rasha Vladimir Putin da babban mai sasanta rikici na Shugaban Amurka Donald Trump ba ta haifar da wani muhimmin ci gaba ba a kokarin kulla yarjejeniyar zaman lafiya ta Ukraine.

Kakakin fadar Kremlin ya ce ganawar da aka yi a Moscow "mai ma'ana ce,” amma Rasha ba za ta amince da wani bangare na daftarin shirin zaman lafiyar ba.

NATO ta yaba wa yunkurin Trump na sulhu a Ukraine

Jakada na musamman ga shugaba Trump,Steve Witkoff, tare da surukin Trump din Jared Kushner, sun halarci tattaunawar ce da shugaban Rasha Vladimir Putin bayan makonni na ganawar diflomasiya da nufin kawo karshen yakin.

Ya zuwa yanzu tawagar Amurkan ba ta yi wani bayani ba tun bayan barin Moscow kamar yadda kafafen yada labarai suka ruwaito.

Rasha ta kaddamar da hare-hare a birnin Kyiv na Ukraine

A ranar Talata, Putin ya ce canje-canjen da Kyiv da kuma Turai suka yi a cikin daftarin zaman lafiya da Amurka gabatar ba sauye-sauye ne da za a amince da su ba, inda ya kara da cewa idan Turai “na son ta tunkari Rasha da yaki to a shirye take nan take.”