An hallaka wani kusa na al-Qaida a Libiya
March 28, 2018![USA Bomben Symbolbild](https://static.dw.com/image/42446259_800.webp)
Ma'aikatar tsaron Amirka ta tabbatar da mutuwar wani kusa na Kungiyar al-Qaida a kasar Libiya. A cikin wata sanarwa da babban kwamandan rindunar sojin Amirka a Afirka ta Africom ya fitar a wannan laraba, ya bayyana cewa sun hallaka Moussa Abou Daoud daya daga cikin shugabannin Kungiyar Aqmi da wani na hannun daman sa a lokacin wasu hare-hare ta sama da suka kaddamar tare da hadin gwiwar sojojin halasttaciyar gwamnatin Libiya ta Fayez al-Sarraj a ranar 24 ga wannan watan na Maris a kusa da garin Oubari na Kudancin kasar ta Libiya.
Amirka dai ta bayyana Moussa Abou Daoud a matsayin mutuman da ke horas da sabbin dauka na Kungiyar ta Aqmi kan yadda za su iya kai hare-haren ta'addanci a yankin, kana ya taimaka wa Kungiyar ta Aqmi da kayan aiki da kudi da kuma makamai domin harar duk wasu kadarorin Amirka da na kasashen Turai a yankin.