Kasar Maroko ta lashe kofin kwallon kafa na Afirka ba masu wasa a gida. Shararren dan wasan kwallon kwando Jeremy Lin ya bayyana yin murabus, ko ya ta kaya a wasannin da aka fafata a karshen mako a lig-lig na Turai?
Maroko ta lashe gasar cin kofin AfirkaHoto: Luis Tato/AFP/Getty Images
Talla
A gasar Bundesliga ta Jamus da aka fafata wasa mako na biyu a karshen mako, inda za a iya cewa kungiyar kwallon kafa ta Bayer Leverkussen ba ta fara kakar ta bana da kafar dama ba. Bayan kashin da ta sha a hannun Hoffenheim a gida a wasan mako na farko da kuma canjaras din da ta yi da Werder Bremen uku da uku a mako na biyu, kungiyar ta saitawa sabon mai horas da 'yan wasanta layi. Da sanyin safiyar Litinin daya ga wannan wata na Satumbar 2025 ne dai, rahotanni suka bayyana cewa Bayer Leverkussen ta kori Erik Ten Hag da ya kama aiki a watan Agustan da ya gabata. Korarren mai horas da 'yan wasan Manchester United, Ten Hag ya canji Xabi Alonson da ya ja ragamar Leverkussen din ta lashe gasar Bundesliga a karon farko tun kafa ta a kakar 2023 zuwa 2024 tare da kammala kakar bara a matsayi na biyu. Alonson dai, ya koma kungiyar Real Madrid ta Spaniya.
Wasan Augsburg da. Bayer Munich na Bundesliga na JamusHoto: Alexander Hassenstein/Getty Images
A sauran wasannin Bundesliga kuwa za a iya cewa Bayern Munich ta sake fara kakar wasan ta bana da kafar dama, inda dan wasan da ta cefano daga Liverpool Luiz Diaz ke nuna bajinta. A gefe guda a iya cewa Borussia Dortmand da ke da maki hudu, na laliben yadda za ta kai ga wannan kambu a karkashin mai horas da 'yan wasanta Niko Kovač da ya taimaka mata ta karkare kakar wasannin ta bara a matsayi na hudu da kyar da jibin goshi. A wasannin na karshen mako dai St. Pauli ta bi Hamburg har gida ta lallasa ta da ci biyu da nema. A bana ne dai Hamburg din ta farfado daga rukuni na biyu, bayan kwashe shekaru da fadawa. Sai dai ko za a iya cewa, ba ta shirya ba ta dawo? Sabanin Hamburg din, takwararta FC Cologne da suka dawo rukunin Bundesliga na farko a bana tare na bayar da mamaki. A wasanta na farko dai, ta bi Mainz har gida ta lallasa ta da ci daya mai ban haushi, yayin da ta karbi bakuncin Freiburg a mako na biyu, ta kuma yi mata cin yankan kauna hudu da daya.
Cinikin 'yan wasa mafi tsada a Bundesliga
Daga Bundesliga zuwa Premier League, shahararren dan wasa Florian Wirtz ya sauya sheka daga Bayer Leverkusen zuwa FC Liverpool a kan kudi Euro miliyan 150, ya zama dan wasa mafi tsada da aka sayar a Bundesliga.
Hoto: Gladys Chai von der Laage/picture alliance
Omar Marmoush - Ero Miliyan 75
Kasuwa ta bude ga Eintracht Frankfurt! A lokacin bazara ta shekara 2023 dan kasar Masar din da ya ke da kwantirage da abokiyar hamayya VfL Wolfsburg, ya sauya zuwa kungiyar ta Hasee a kyauta. Shekara guda da rabi bayan komawarsa, Frankfurt ta sayar da shi a kan makudan kudi Euro miliyan 75 da yiwuwar samun karain garabasa ta Euro miliyan biyar ga kungiyar kwallon kafa ta Manchester City.
Hoto: imago images/Jan Huebner
Kevin De Bruyne - 76 Millionen Euro
Bayan an amince da sayar da shi a kan kudi Euro miliyan 76, shararren dan wasan na VFL Wolfsburg ya amince da sanya hannu a kan kwantiragi da kungiyar kwallon kafa ta Manchester City a bazarar 2015. Koda yake kungiyar ta VW ta samu makudan kudi bayan sayar da dan wasan, amma za a yi kewar yadda De Bruyne ya taka leda a kungiyar ta 'Wolves'.
Hoto: Getty Images/Bongarts/M. Rose
Lucas Hernandez - Euro Miliyan 80
Ya kasance dan wasa mafi tsada a tarihin FC Bayern Munich. A lokacin bazarar shekara ta 2019 Bayern ta sayi Lucas Hernandez a kan kudi Euro miliyan 80. A lokacin ya lashe kofin duniya da kasarsa Faransa a shekara ta 2018, Bayern Munich ta sayo shi daga kungiyar Atletico Madrid. Ya kasance dan wasa mafi tsada da aka saya a Bundesliga, kana dan wasan baya mafi tsada a duniya.
Hoto: Stefan Matzke/sampics/picture alliance
Jadon Sancho - Euro MIliyan 85
Daga Bundesliga zuwa Premier League: Bayan cimma yarjejeniyar Euro Miliyan 85, dan wasan dan asalin kasar Ingila mai shekaru 21 a duniya a wancan lokaci ya sauya sheka daga kungiyar Borussia Dortmund ta Jamus zuwa Manchester United ta Inglia a bazarar 2021. Ciniki mai kyau ga BVB, shekaru hudu bayan da ta sayi dan wasan a kan kudi Euro Miliyan bakwai da dubu 500 daga kungiyar Manchester City.
Hoto: Mario Hommes/DeFodi Images/Getty Images
Josko Gvardiol - Euro Miliyan 91 da dubu 500
Ya kasance dan wasa baya na tsakiya, sai dai kwallon da ya ci ya sanya dan wasan kasar Kuroshiya ya dauki hankalin Pep Guardiola. Gvardiol ya ci kwallo a gasar zakarun Turai a watan Fabarirun 2023 ga kungiyarsa ta RB Leipzig a fafatawarsu da Manchester City da Guardiola ke horaswa. Watanni shida bayan kammala gasar, kungiyar ta Ingila ta saye shi ya zama dan wasan baya mafi tsada a duniya.
Hoto: Christian Schroedter/IMAGO
Randal Kolo Muani - Euro Miliyan 95
Ana dab da rufe hada-hadar cinikin 'yan wasa Bafaranshen ya bar kungiyarsa ta Eintracht Frankfurt a 2023. Ya kasance dan wasan da ya fi cin kwallaye a kakar Bundesliga, inda ya ci kwallaye 15 ya uma taimaka an ci 16. Duk da sayen sa a kan kudi Euro miliyan 95, kungiyarsa ta Frankfurt ba ta yi wani farin ciki ba. An saye shi jim kadan bayan rufe cinikin 'yan wasa a Jamus, babu damar yin ciniki.
Hoto: Arne Dedert/dpa/picture alliance
Harry Kane - Euro miliyan 95
Bayan dogon cinki, maciyin kwallo a gasar Premier League ya koma FC Bayern, bayan kwashe tsawon lokacin kwallonsa a kungiyar Tottenham Hotspur. Kyaftin din kungiyar kwallon kafa ta Ingila, ya kasance dan wasa mafi tsada da aka saya a tsawon sama da shekaru 60 na tarihin Bundesliga a kan kudi Euro miliyan 95.
Hoto: Richard Heathcote/PA/picture alliance
Kai Havertz - Euro Miliyan 100
Kungiyar kwallon kafa ta Chelsea ta yi cinikin dan wasan nan take a kan kudi Euro miliyan 80, a 2020. An sayi dan wasan mai shekaru 21 a wancan lokaci Kai Havertz daga Bayer 04 Leverkusen ta Jamus. Cinikin ya kai Euro Miliyan 100, ta la'akari da abin da ke da alaka da kwazonsa. Kwalliya ta biya kudin sabulu, domin a 2021 dan wasan dan kasar Jamus ya jagorance su lashe kofin zakarun Turai.
Hoto: picture-alliance/dpa/M. Meissner
Jude Bellingham - Euro Miliyan 113
Bayan kwashe shekaru uku a Borussia Dortmund, dan kasar Ingilan ya koma Real Madrid a 2023 tare da saka hannu kan kwantirage zuwa 2029. Kudin cinikin da aka biya wani bangarensa ga kungiyarsa ta Birmingham City FC, zai karu daga baya ta hanyar garabasa zuwa Euro miliyan 113 kamar yadda kasuwar cininkin 'yan wasa ta 'transfermarkt.de' ta sanar.
Hoto: Martin Meissner/AP/picture alliance
Ousmane Dembélé - Euro Miliyan 135
A 2017 FC Barcelona ta sanya Euro miliyan 105 a asusun Borussia Dortmund, domin sayen Ousmane Dembélé. Kudin sun karu zuwa Euro miliyan 135 million, sakamakon garabasa da ya samu. Tun asali Dembélé da bai kasance dan wasa mai dadin sha'ani ga an saye shi ne a kan kudi Euro miliyan 14. A watan Disamba na 2023, Dembélé ya koma kungiyar Paris St. Germain tare da lashe kofin zakarun Turai a 2025.
Hoto: picture-alliance/dpa/G. Kirchner
Florian Wirtz - Euro Miliyan 150
A cinkin da ya kafa tarihi na kudi Euro miliyan 150, guda cikin kwararrun 'yan wasan Jamus ya sauya sheka. Maimakon ya koma FC Bayern da kila za ta so ta saye shi saboda kwarewarsa wajen iya sarrafa kwallo, Wirtz ya zabi ya koma kungiyar FC Liverpool ta Ingila. An dai saye shi a kan kudi Euro miliyan 125, inda za a rinka biyansa albashin Euro miliyan 12 zuwa 15 a shekara.
Hoto: Sebastian El-Saqqa/firo/picture alliance
Hotuna 111 | 11
Frankfurt ta bi Hoffenheim har gida ta caskara ta da ci uku da daya, RB Leipzig kuwa ta karbi bakuncin Heidenheim ta lallasa ta da ci biyu da nema kamar yadda Stuttgart ta karbi bakuncin Borussia Mönchengladbach ta casa ta da ci daya mai ban haushi. Bayern Munich kuwa ta bi FC Ausgburg har gida ta yi mata dukan kawo wuka da ci uku da biyu kana Borussia Dortmund ta karbi bakuncin Union Berlin ta lallasa ta da ci uku da nema, an kuma tashi wasa kunnen doki daya da daya tsakanin Wolfsburg da Mainz.
Maroko ta lashe gasar cin kofin Afirka, inda Gianni Infantino shugaban FIFA, da Shugaba William Ruto na Kenya gami da Patrice Motsepe shugaban hukumar kwallo ta AfirkaHoto: Luis Tato/AFP/Getty Images
Kasar Maroko ta lashe gasar cin kofin kasashen Afirka masu buga wasa a gida na kwararru karo na uku bayan doke kasar Madagaska a wasan karshe da aka kara ranar Asabar da ta gabata a birnin Nairobi na kasar Kenya. Morokon dai ta samu nasara da ci 3 da 2, nasarar kuma ta nuna yadda kasar ke ci gaba da nuna tasiri a wasannnin kwallon kafa na kasashen Afirka.
Bayan kwashe tsawon shekaru tara ana fafatawa da shi a fagen kwallon kwando, shararren dan wasan kwallon kwandon Jeremy Lin ya bayyana yin murabus a shafinsa na Instagram. Lin ya wallafa cewa: "Ya kasance abin alfahari a rayuwata, fafatawa a fagen wasa da kwararrun da suka shahara cikin kalubale da duniya ba ta taba tsammanin dan wasa kamar ni zai iya ba.
Dan kasar Australia Alex De Minaur da ke kara wasan Tennis mai tasiri na US-Open karo na uku a jere, ya ce zai ci gaba da gwada sa'a. A wannan karon ya kai zuwa mataki na uku, abin da ke nuna irin shirin da dan wasan na Australia ya yi.
Haka Jannik Sinner da Iga Swiatek suna cikin wadanda suka nuna gwaninta a karshen mako, inda suka kai mataki na gaba a gasar ta Tennis ta US-Open da ke wakana a kasar Amurka. Sai dai duk 'yan wasan biyu sun kai mataki na gaba ta hanyar tsallake rijiya da baya, lamarin da ke nuna halin da gwanaye suka samu kansu a gasar ta Amurka.
Novak Djokovic a wajen wasan Tennis na US-OpenHoto: Corinne Dubreuil/ABACAPRESS/IMAGO
Akane Yamaguchi ta doke tsohuwar 'yar wasan kwallon badminton da ke matsayi na daya a jadawalin gasar a duniya Chen Yufei ta Chaina da ci 21-9 da 21-13 a Lahadin karshen mako, a bin da ya ba ta damar samun nasarar lashe wasan karshe na gasar kwallon badminton din ta duniya da ta gudana a birnin Parsi na Faransa. 'Yar kasar Japan din Yamaguchi ta samu nasarar cikin mintuna 37, inda ta samu kofin zinarenta na uku a gasar. Dama dai, Yamaguchi din ce ta lashe gasar a shekara ta 2021 da 2022.
Dan kasar Habasha Hailemaryam Kiros da 'yar kasar Holland Sifan Hassan sun samu nasara a gasar gudun fanfalake ta duniya bangaren mata da maza da aka gudanar a birnin Sydney na kasar Australiya. Kiros ya samu nsarar kammala gudun a sa'o'i biyu da mintuna shida da dakika shida, abin da ya sa ya zama na biyu a tarihi da ya kammala gasar ta birnin Sydney cikin sauri. Mai shekaru 28 a duniya, dan kasar Habashan ya kammala tseren dakika 10 tsakaninsa da dan uwansa Addisu Gobena yayin da dan kasar Lesotho Tebello Ramakongoana ya kammala a matsayi na uku.
A nata bangaren Sifan Hassan ta kammala tseren na gudun fanfalaken a sa'o'i biyu da mintuna 18 da dakika 22, mintuna kusan uku tsakaninta da 'yar kasar Habasha Workenesh Edesa da ta kafa tarihi a bara. 'Yar kasar Kenya Brigid Kosgei ta kammala a matsayi na biyu bayan Hassan da tsiran dakika 34, yayin da Edesa ta kammala a matsayi na uku.
