Da ma dai ba tun yanzu ba, majiyyata da ma 'yan uwan masu cutar ta koda ke kokawa da yadda ake kashe makudan kudi kafin a yi aikin wankin kodar. Gwamnatin ta ce, tuni ta fara wannan rahusa a wasu asibitoci 10 na kasar kafin daga bisani a fadada zuwa sauran asibitocin kasar kafin karshen wannan shekarar ta 2025. A yanzu maimakon biyan Naira dubu 50 a duk lokacin aikin wankin kodar, yanzu Naira dubu 12 kawai za a biya.

Asibitocin tarayya da suka fara aiwatar da sabon tsarin na rahusa, sun hadar da guda biyu a Lagos da daya a Abuja da Owerri da kuma Maiduguri. Sauran su ne na Abeokuta da Azare da Benin, sai kuma na Calabar. Alkaluma dai na nuna cewar, akwai kimanin mutane miliyan 20 a Najeriyar da ke dauke da cutar ta koda. Sai dai kuma wasu bayanai na nuna cewar, dashen koda kyauta ne a wasu kasashen Afrika. Kasashen da ake dashen kodar sun hadar da Sudan da Masar da Afrika ta Kudu, amma fa ga 'yan asalin kasashen kadai.