Ministar jin kai ta kasar, Sadiya Umar ta ce kimanin dalibai 370 ne suka isa babban birnin kasar Abuja daga Masar. A jawabinta yayin tarbarsu a filin jirgin sama na Nnamdi Azikiwe, Sadiya ta ce, sun yi matukar farin ciki kan yadda babu asarar rayuka a cikin 'yan Najeriya duk da irin tashin hankali da kuma wahalhalu da suka fuskanta.

Hukumomin sun ce, tun a ranar lahadin da ta gabata ne dai jiragen soji da kuma na wasu kamfanoni na Najeriya suka isa birnin Aswan na kasar Masar, sai dai an samu tsaikon kwaso daliban ne sakamakon wasu ka'idoji, wanda sai a jiyar Laraba aka warware su.

Rahotannin sun yi nuni da cewa, akwai sauran 'yan Najeriya kimanin dubu biyu da suka rage a Sudan, wanda ake sa ran kwaso su nan da kwanaki kadan.