Majalisar dattawa ta kasar Rasha da ke zama majalisar shawara ta amince da saka ranar 17 ga watan Maris na shekara mai zuwa ta 2024 a matsyin ranar da za a gudanar da zaben shugaban kasar. Ana sa ran Shugaba Vladimir Putin zai ayyana takara kan sake neman mukamun na shugaban kasar. Idan Putin mai shekaru 71 ya samu nasara a zaben mai zuwa zai mulki kasar har zuwa shekara ta 2030 kuma yana da izinin sake takara domin ci gaba da mulki har zuwa shekara ta 2036.

A wani labarin Shugaba Vladimir Putin na Rasha ya yaba bisa dangantakar da ke wakana tsakanin kasarsa da kuma Iran, inda ya bayyana hakan lokacin da yake karban bakuncin Shugaba Ebrahim Raisi na kasar Iran. Shugabannin biyu sun kuma tattauna rikicin da ke faruwa tsakanin Isra'ila da kungiyar Hamas ta Falasdinu.