Wakilai 306 ne suka zaɓi Mr. Biden, yayin da shugaba mai barin gado Donald Trump wanda har yanzu bai amince da shan kaye ba, ya ke da wakilai 232.

A ranar 6 ga watan Janairu ne dai 'yan majalisar ƙasar za su tabbatar da zaɓin wadannan wakilai, inda mataimakin shugaban ƙasa Mike Pence zai jagoranci zaman.

An dai tsaurara matakan tsaro a wasu jihohin da wakilai masu zaɓen suka hallara domin kaɗa kuri'un tare da bin dokokin kariyar cutar corona.

Zaɓaɓɓen shugaban na Amirka Joe Biden ya bayyana zaɓen nasa a matsayin nasara ga dimukuraɗiyya da ma Amirka baki ɗaya.