Gwamnatin Ukraine ta ce ta gano yadda aka yi kutse ga kwamfyutoci kusan 2000 da ke kunshe da muhimman bayanai. Hukumar da ke lura da ayyukan intanet ta Ukraine CERT-UA ta ce an makalawa kamfyutocin wata tangarda da ta rikita musu ayyukansu.

Hukumomin kasar ba su bayyana sunayen hukumomi da kamfanonin da kutsen ya shafa ba. Amma a baya manyan hukumomin gwamnati uku sun fuskanci irin wannan kalubale.

Tun bayan kutsen Rasha a Ukraine, hukumomin kasar sun fuskanci hare-hare ta intanet dabam-dabam, inda jami'an gwamnati a birnin Kiev galibi ke zargin gwamnatin Rasha da wannan ta'adi. Sai dai mahukunta a birnin Moscow ba su taba cewa komai a kan zarge-zargen ba.