Duk da dan sassaucin da suka nuna Rasha da Sin sun fara nuna wata adawa wadda ka iya janyo jinkiri a kuri´ar da za´a kada yau akan wani kudurin kwamitin sulhun MDD wanda zai tanadi sanyawa KTA takunkumi saboda gwajin makamin nukiliya da ta yi. Jakadan Amirka a MDD John Bolton ya ce kwaskwarimar da gwamnatocin Mosko da Beijing suka nema da a yiwa daftarin kudurin, wani abu ne na fasaha saboda haka ana iya ci-gaba da kada kuri´ar a yau asabar kamar yadda aka tsara. To amma jakadan Sin a MDD Wang Guangya ya ce har yanzu ba´a cimma wata yarjejeniya ba. a yau kasashe 5 masu ikon hawa kujerar naki a kwamitin sulhu da Japan zasu gana gabanin zaman taron membobi 15 na kwamitin wadanda zasu tattauna game da canje canjen da za a yiwa daftari kudurin. Daftarin baya bayan nan ya nemi KTA da ta lalata dukkan makamanta na nukiliya to amma bai tanadi daukar matakan soji kanta ba.