Riyad al-Maliki da ya gana da Fatou Bensouda mai shigar da kara a kotun ta ICC da ke birnin Hague na kasar Netherland, ya nemi ta shigar da koken gaban kotun don ganin kotun ta yi aikinta na bincike da hukunta wanda aka samu da hannu a kisan. Ya ce yin hakan na da matukar mahinmanci ga al'ummarsa da suka kwashi shekara da shekaru suna fuskantar cin zarafi iri-iri daga jami'an tsaron Isra'ila.

Ganawa a tsakanin al-Maliki da Bensouda na zuwa ne bayan mutuwar wasu Falisdinawa guda sittin da ake zargin sojojin Isra'ilan da yi a yayin zanga-zanga da ta barke a zirin Gaza don adawa da matakin Amirka na mayar da ofishin jakadancinta birnin Kudus a makon da ya gabata.