Tatakin da 'yan kungiyar ta Shi'a ke yi a Abuja ya sanya daukan tsauraran matakai a daukacin hanyoyin shiga da fita Abuja, amma duk da haka sai dai ta kai ga artabu tsakaninsu da jami'an tsaro, wanda ya fi muni shi ne abin da ya faru a unguwar Nyanya da ke Abuja inda ta kai ga sojojin bude wuta a kansu, mutane dai da dama sun mutu kana wasu suka jikkata.

Alkaluman yawan mutanen da aka kashe a artabun da aka yi na sabawa juna, saboda rashin sanin zahirin adadin da abin ya shafa, musamman wadanda suka mutu. Masana harakar tsaro da ma kare hakin jama'a na nuna damuwa a kan daukacin lamarin da jami'an tsaro suka yi gum a kan bayyana halin da ake ciki.