Wannan babban zaman taro tsakanin shugabannin manyan kasashen biyu na zuwa ne a daidai lokacin da dangantaka ta tabarbare tsakaninsu sakamakon zarge-zargen da Amirkan ke yi wa kasar ta Rasha musamman ma kan batun kutse a lokacin zaben shugaban kasar ta Amirka. Baya ma ga wannan batu, akwai kuma batutuwa irin su rikicin gabashin Ukraine, da Siriya da ma Iran da ake ganin za su mamaye wannan zaman taro na tsakanin shugabannin manyan kasashen biyu.

Shugaba Vladimir Putin na Rasha da ake yi wa kallon shugaba mai karfi, da kuma Donald Trump na Amirka da ake yi wa kallon mai cike da basira, sun sha kyalla wa juna idanu tare da nuna damarsu ta inganta huldar da ta yi tsami a tsakanin kasashen biyu. Sai dai kuma a baya kasar ta Amirka ta yi karin takunkumi ga Rasha, tare da korar jami'an diflomasiyyar kasar ta Rasha da dama daga Amirka, matakin da Rashan ta mayar da martani a kan shi.