Kamfanonin kera manyan makamai a duniya, sun samu karuwar kudaden shiga da kaso 5.9 cikin ɗari a bara, sakamakon karuwar bukatu da ta samo asali daga yakin Ukraine da Gaza, tare da karin wasu kashe-kashen tsaro da kasashe ke yi.

A cewar rahoton da cibiyar binciken neman zaman lafiya ta kasar Sweden SIPRI, ta fitar a wannan Litinin, kudaden shiga da manyan kamfanoni 100 masu kera makamai suka samu sun haura zuwa dala biliyan 679 a 2024, adadi mafi yawa tun da aka fara irin wannan kididdiga a duniya.

Yawancin wannan karuwa ya fito ne daga kamfanonin kasashen Turai da na Amurka, duk da cewa an samu dan karuwa a sauran nahiyoyi, banda Asia da Oceania, inda matsalolin da ke tattare da masana’antar makaman China suka janyo raguwar kudaden shiga.