Kungiyar Boko Haram ta futar da wannan sabon faifayin bidiyo ta kafar sadarwar ta intanet watau Youtube inda aka nuna yadda mayakan kungiyar suka yi sallah a wasu wurare da ba a bayyana ba. A cewar wanda ya yi limanci a daya daga cikin wuraren wanda kuma ya yi jawabi a faifayin bidiyon wanda ke da tsawon mintuna 13 ya ce an nadeshi ne a ranar Litinin da ta gabata ranar sallah.

Muhawara da jama'a ke yi a game da rashin ganin hoton Abubakar Shekau a bidiyon

Sabon faifayin bidiyon dai bai fayyace komai a kan ikirarin sojoji na raunaya ko ma hallaka shugaban kungiyar Abubakar Shekau a wani hari a cikin watan da ya gabata, inda kawai suka jaddada cewar karkashin jagorancinsa suke har ya zuwa yanzu.Rashin fitowar shugaban kungiyar a wannan faifayin bidiyo kamar yadda ta saba ya haifar da ayar tambaya tsakanin ‘yan Najeriya da ke ganin watakila abin da sojojin Najeriyar ke fada na raunatashi ko hallakashi ya zama gaskiyya.

Har yanzu gwamnatin Najeriya ba ta mayar da martani ba

Ya zuwa yanzu dai gwamnati ta Najeriya ba ta ce komai ba kan fitowar wannan sabon faifayin bidyo wanda ake ganin sabon kalubale ne ga gwamnatin da ma rundunar sojojin Najeriya wacce da farko ta yi ikirarin samun nasara a kan kungiyar.