Fadar Kremlin ta ce, har yanzu kasashen yammacin duniya ba su fito sun nuna a fili ko kuma a aikace cewar, a shirye suke su shiga zaman warware rikicinta da Ukraine ba. Kakakin fadar Dmitry Peskov ne ya sheda haka yana mai cewa, a aikace dai, babu wani shiri ko kafar zaman lafiya da hadakar kasashen yamma ta samar da ke nuna alamun a yi sassanci.

A yayin rufe taro kan tsaro da ya gudana a birnin Munich na Jamus, Amurka ta ci gaba da yin gargadi ga Chaina a game da shirinta na taimaka wa Rasha da duk wani nau'in taimako a yakin da take a Ukraine, lamarin da Amurkan ta ce, zai haifar da matsala babba a dangantakar kasashen biyu.