China ta gudanar gagarumin biki don cika shekaru 70 da kafuwar mulkin kwamunisanci a Jamhuriyar kasar.

Shugaban Xi Jingping wanda har ila yau shine sakataren koli na jam'iyyar kwamunisanci ta China kuma shugaban hukumar sojin kasar tare da sauran shugabanni sun hallara a dandalin Tian'anmen inda suka kalli faretin soji.

A jawabinsa shugaba Xi yace suna matukar farin ciki da alfahari da wannan rana wadda ta hada kan dukkan al'umomin China na gida da waje tare da yiwa kasar su fatan alheri.

Yayin faretin, sojoji sun gwada cigaban da suka samu na makamai domin karfafa tsaron kasa.

Sai dai kuma kasar na fuskantar kalubalen siyasa da na tattalin arziki sakamakon takaddamar cinikayya tsakaninta da Amirka, lamarin da ya shafi safarar kayayyakin kasar zuwa kasuwannin duniya.