Ma'aikatar hulda da kasashen ketare ta kungiyar Tarayyar Turai EU, ta ce wakilan kasashen Chaina da Faransa da Jamus da Rasha da Birtaniya da kuma Iran din ne za su halarci tattaunawa. Cikin wata sanarwa da ma'aikatar ta fitar, ta nunar da cewa tattaunawar tasu za ta mayar da hankali wajen ganin yadda Amirka za ta koma cikin yarjejeniyar da ake wa lakabi da JCPOA, bayan fitar da ita da tsohon shugaban kasar Donald Trump ya yi da kuma yadda za a cimma matsaya mai inganci a tsakanin bangarorin biyu.