Wani mamba a Kwamitin Bincike na Majalisar Dinkin Duniyar Chris Sidoti ne ya bayyana hakan yayin taron shugabannin kare hakkin dan Adam a Geneva, inda ya ce sun fuskanci an fi samun cin zarafin dan Adam din daga bangaren Isra'ila. Sai dai sun kara da cewa a yankunan Falasdinawa kamar Gabar Yamma da Kogin Jordan da kuma Zirin Gaza ma, ana samun takurawa mutane ta hanyar haramta musu taruwa waje guda ko yin gangami da ma bayyana ra'ayoyinsu. Sidoti ya kara da cewa, mahukuntan Isra'ila na kara kaimi wajen dakile hakkokin dan Adam da ma takaita ayyukan kungiyoyi masu zaman kansu a kokarin da take na ci gaba da mamaye yankunan Falasdinawa.