Najeriya: Buhari ya kulle Kano
April 28, 2020![Nigeria Wahlkampf von APC-Partei in Kano](https://static.dw.com/image/48026069_800.webp)
Shugaban Najeriyar Muhammadu Buhari dai, ya fito ne da nufin kwantar da hankalin al'ummar Tarayar Najeriyar da idanuwansu ke dada budewa da barazanar annobar mai tasiri a cikin kasar. Tun ba a kai ga ko'ina ba dai al'ummar sun fara mayar da martani ga jawabin da ya ambato sassautawa a biranen Legas da Abuja da jihar Ogun, sannan da kara tsaurin matakai a jihar Kano da ke neman rikidewa ya zuwa cibiya ta cutar a kasar.
Kyakkyawan fata
Faruk B B Faruk na zaman wani mai sharhi a cikin harkokin mulki na kasar, ya kuma ce tsarin da shugaban kasar ke dauka na kama da kwaiwayon Turawan da ke da arziki na tunkarar annobar a cikin sauri. Ga Hashim Sule da ke shirin tunkarar wasu makonni guda biyu a birni na Kano, akwai sabon fata a kalaman shugaban kasar.
Ra'ayi dai ya bambanta tsakanin likitoci da ke tunanin karbe yakar cutar a hannun gwamnatin jihar da kuma masanan da ke ganin a kyale gwamnan ya taka rawa, na iya tasiri a kokari na tunkarar rikicin.
Hada hannu ko karbewa?
Dr. Husaini Tukar Hassan na zaman wani masani a cikin harkokin mulki, a cewarsa akwai bukatar shugaban kasar ya hada hannu da gwamnatin jihar domin warware batun. To sai dai ga Dr. Mohammed Adamu Askira da ke zaman wani likita a Kanon, karbe yakin daga hannu na jihar kadai ne zai iya taimakawa wajen kaucewa tunkarar annoba mai girma
Ya zuwa ranar yau dai yawan masu dauke da cutar ya tasamma 1,500 a daukacin Najeriyar, a yayin kuma da asara ta rayuka ta kai 40.