Gwamnatin Taliban ta Afghanistan ta aike da wata tawagar jami'an diflomasiyya zuwa Jamus, kamar yadda gidan rediyon NDR na kasar ya ruwaito.

Jami'an uku za su shafe makonni uku a Jamus, kuma a halin yanzu suna ofishin jakadancin Afghanistan da ke Berlin.

Ma'aikatar Harkokin Wajen Jamus ta tabbatar da kasancewar tawagar, tana mai cewa ziyarar na da nasaba da shirye-shiryen sake mayar da wasu 'yan kasar Afghanistan daga Jamus zuwa kasarsu.

Shekaru biyar bayan Taliban ta sake karbar iko a Kabul, har yanzu Rasha ce kadai ta amince da gwamnatinta a hukumance.