Dakarun Rasha sun tabbatar da janyewa daga garin Lyman na yankin Donesk da ke gabashin Ukraine. Hakan na zuwa ne bayan da Rasha ta yi fargabar cewa, dakarunta kimanin dubu biyar ka iya fadawa tarkon dakarun Ukraine.

A wannan Asabar din ce dai Ukraine ta sanar da yiwa garin kawanya tare da kwace ikon Lyman din, bayan dauki ba dadi da ake yi tsakanin bangarorin biyu da ke yaki.

A makwannin baya-bayan nan dai Rashar ta fuskanci koma bayan ayyukan soji a yakin da take yi da makwafciyarta. Ko da yake a ranar Juma'a, Rashar ta yi bikin shigar da yankuna hudu na Ukraine cikin kasarta; sai dai kuma shugaba Volodmyr Zelensky ya sha alwashin cewa dakarun Kiev za su sake kwato yankunan.