A wannan Alhamis cikin wadanda suka fita gangamin har da dalibai na jami'a da tsofaffin mutane wadanda ke neman kari na matsin lamba ga mahukunta ta yadda za su kara azama a aikin da suke yi don alkinta muhalli da kauce wa dumamar yanayi.

'Yan sanda sun bayyana cewa gangamin da aka yi a birnin Brussels a wannan rana ta Alhamis ya samu mahalarta kimanin 11,000.

Daliban da dama dai sun fita gangamin da ake fita duk Alhamis makonni shida ajere duk kuwa da yadda malamai ke neman sanyaya gwiwar daliban kada su bar ajin karatunsu.

An dai faro gangamin da wasu mutane dubbai da sannu a hankali suka kai 35,000 a makonni biyu da suka gabata. Babban burin gangamin dai shi ne matsin lamba gabanin zabukan da za a yi a mataki na kasa da ma Kungiyar Tarayyar Turai.