Majalisar tarayyar Turai ta sanar da haramtawa jami'an diflomasiyyar Iran da ma na gwamnati shiga kasashenta, sakamakon zarginta da amfani da karfi fiye da kima a kan masu zanga-zangar adawa da tsadar rayuwa a kasar.

Shugabar majalisar Roberta Metsola, ta ce Turai ba za ta taba aminta da yadda gwamnatin Iran ke gallazawa al'ummarta ba, har ma da kashe wasunsu, kamar yadda ta wallafa a shafinta na sada zumunta na X ranar Litinin.

Karin bayani: Zanga-zangar Iran: Trump na tunanin daukar matakin soji

Daruruwan mutane ne suka rasa rayukansu a yayin wannan zanga-zanga, wadda aka fara a ranar 28 ga Disamban shekarar da ta gabata ta 2025.

Ko a ranar Lahadi sai da Roberta Metsola ta shawarci mahukuntan Iran su sauya salon yadda suke tunkarar masu boren, domin daina kashe su.