Tun dai bayan billar cutar Coronavirus a kasar Chaina inda ta halaka mutane da dama, da kuma yaduwarta a wasu kasashen, Hukumar Lafiya ta Duniya WHO da sauran kasashen duniya suka dukufa wajen daukar matakan rigakafin yaduwar cutar a cikin kasashensu. A yayin da wasu kasashen suka tsaurara matakan gudanar da bincike a filayen jiragen sama da na kasa da ma na ruwa na kasashensu, musamman na fasinjan da ke fitowa daga kasar Chaina, wasu kasashen irin su Amirka da Faransa da Japan sun dauki matakin kwaso mutanensu daga kasar ta Chaina zuwa gida.