Majalisar Dinkin Duniyar ta ce dubban Falasdinawan na kokarin tsira da rayukansu ne daga bama-baman Isra'ila a yankin Zirin Gazan, wanda jami'an kiwon lafiya suka ce ya halaka mutane da dama cikin as'o'i 24 kacal. Munanan hare-haren da dakarun Isra'ilan ke kai wa a Zirin Gaza ta kasa da kuma ta sama a kokarin murkushe mayakan kungiyar Hamas masu gwagwarmaya da makamai a yankin dai, sun tilasta kimanin kaso 85 cikin 100 na al'ummar yankin da ke da yawan jama'a miliyan biyu da dubu 300 tserewa domin tsira da rayukansu. Koda yake suna tserewa ne zuwa yankunan da Isra'ilan ta bayyana da "tudun mun tsira" hakan bai sa sun tsiran ba domin kuwa Isra'ilan na ruwan bama-bamai a yankunan, abin da ya sanya Falasdinawan cikin fargaba da kuma bayyana cewa babu wajen tsira.