Sabon nau'in da acewar Firaministan Burtaniyar ke yaduwa fiye da kwayar cutar corona da akafi sani, yafi kamari ne a birnin London da kuma gabashin Ingila. Kawo yanzu lamarin ya tilasta wa sauran kasashen Turai rufe zirga-zirgar jiragen sama a tsakaninsu da Birtaniya don gudun kar a kai  musu sabuwar cutar.  

Wasu daga cikin kasashen da suka dakatar da zirga-zirga a tsakinsu da Birtaniya sun hada da Rasha da Indiya da Kanada da Isara'ila da Saudiyya da Iran da kuma Moroko. Nan gaba a wannan Litinin ne wakilan kasashen Turai za su tattauna yadda za su tunkari sabon nau'in na corona.