Rahotanni daga jihar Kogi da ke tsakiyar Najeriya, na cewa wasu 'yan bindiga sun fasa wani gidan yari da ke karamar hukumar Kabba/Bunu tare da kubutar da fursunoni 240.

Hukumomin jihar sun ce akwai mutane 290 da ke tsare a gidan yarin ciki har da wasu 224 da ke jiran shari'a lokacin da maharan suka kai hari da manyan makamai a daren ranar Lahadi.

Kawo yanzu dai ba a tabbatar da maharan ba, sai dai jami'ai sun ce za a ci gaba da farautar fursunonin da suka tsere da kuma maharan da suka kai harin. Fasa gidan yari dai ba sabon labari ba ne a Najeriya, inda yankunan kasar da dama ke fuskantar hare-haren 'yan bindiga. Ko a watan Afrilu, 'yan bindiga sun kai hari hedkwatar ' yan sandan Owerri, inda suka saki fursunoni sama da 1,800.