Ganawar Merkel da Issoufou kan matsalar bakin haure
August 14, 2018![Der nigrische Präsident Issoufou in Berlin](https://static.dw.com/image/16798649_800.webp)
Shekaru 55 da suka wuce ne magabatan Jamhuriyar Nijar da na Jamus suka rattaba hannu kan yarjejeniyar hulda tsakaninsu. Kawo yanzu Nijar ta ci gajiya daga Jamus a fannoni dabam-daban ciki har da noma. Karancin abinci sakamakon rashin ingantar noman damuna da kasar ke fuskanta, ya sa sassa biyu bunkasa noman rani domin a samu yalwatar abinci a NIjar.
Sani Mahamadou Abdou Gao, jami'i a hukumar GIZ ta Jamus ya ce tun shekarun da suka gabata ne aka zabi jihohin Agadez ta Tahoua da Tillaberi a matsayin zakaran gwajin dafi na noman rani, kuma manoma 22 000 ne suka ci gajiya daga garuruwa 130.
A fannin yakar 'yan ta'adda karkashin rundunar G5 Sahel kuwa, gwamnatin Jamus ta taka rawar gani a Nijar wajen taimaka wa da dabaru da kayan aikin yakar masu tsananin kishin addini da ke kai hare-hare. Mohamed Bazoum, ministan da ke kula da harkokin cikin gida ya ce wannan ya ba su damar canza kamun ludayinsu a fannin yaki da fataucin miyagun kwayoyi da masu fasakworin mutane domin kai su Libiya da nufin shiga nahiyar Turai.
Wasu alkawaru da Jamus ta rattaba hannu a kansu da gwamnatin Nijar da suka hada da yaki da masu fataucin bakin haure da ke ratsa hamada zuwa Turai ba su shiga hannu ba tukuna.