An fara gasar cin kofin kwallon kafa na kasashen Afirka, ta 'yan wasan da ke taka leda a gida wato CHAN karo na takwas da kasashe uku ke daukar bakunci.
'Yan wasan kwallon kafa na Angola, guda cikin kasashe masu masaukin bakiHoto: Daniel Beloumou Olomo/AFP/Getty Images
Talla
Kasashen Kenya da Yuganda da Tanzaniya ne, ke karbar bakuncin gasar ta 'yan wasan kwallon kafa da ke bugawa a gida a nahiyar Afirka wato CHAN. Za dai a kammala wannan gasar a ranar 30 ga wannan wata na Agusta da muke ciki, inda kasashen Afirkan 19 da ke harlartar gasar za su fafata a tsakaninsu. Wannan dai shi ne, adadi mafi yawa na masu buga gasar ta CHAN a tarihi. An kasa kasashen rukuni hudu, inda a rukunin A ake da kasashen Kenya da Maroko da Angola da Jamhuriyar Dimukuradiyyar Kwango da kuma Zambiya. A rukunin Ba, akwai Tanzaniya da Madagascar da Mauritaniya da Burkina Faso da Jamhuriyar Afirka ta Tsakiya. A rukunin Ca akwai Yuganda da Jamhuriyar Nijar da Guinea da Aljeriya da Afirka ta Kudu, kana kasashen Senegal da Kwango Brazaville da Sudan da Najeriya ke a rukunin Da.
A yayin bude gasar, Tanzaniya guda cikin masu masaukin bakin, ta lallasa Burkina Faso da ci biyu da nema. Ita ma Kenya ta doke Jamhuriyar Dimukuradiyyar Kwango da ci daya mai ban haushi, yayin da Maroko ta caskara Angola da ci biyu da nema an kuma tashi wasa tsakanin Madagaska da Mauritaniya canjarsa babu. Jamhuriyar Nijar za ta fafata da Guinea a filin wasa na Nelson Mandela da ke birnin Kampala, yayin da Yuganda mai masukin baki za ta kece raini da Aljeriya. Ita kuwa tawagar Najeriya za ta fafata ne da Senegal mai rike da kofin a halin yanzu a Talatar wannan mako, yayin da Kwango Brazaville za ta kece raini da Sudan.
Bundesliga: Cinikin 'yan wasa mafi tsada a tarihi
Sayan dan wasa Timo Werner daga RB Leipzig zuwa Chelsea ya kasance dan kwallon kafar kasar Jamus mafi tsada a tarihin gasar Bundesliga. Ga wasu daga cikin cinikin 'yan wasa da suka ja hankula.
Hoto: picture-alliance/dpa/J. Woitas
Ousmane Dembele
Yarjejeniyar cinikin dan wasan daga Borussia Dortmund zuwa Barcelona ta kasance mafi tsada da aka gani a cinikayyar 'yan wasa na duk wata kungiyar kwallon Bundesliga. An biya Dortmund Euro miliyan 105 baya ga kudaden talla, kafin ta amince ta mika shi. Nasara ce babba ga dan shekaru 20 da haihuwan, sai dai har yanzu Dembele bai taka rawar gani tun bayan komawarsa Spain ba.
Hoto: picture-alliance/dpa/G. Kirchner
Lucas Hernandez
Kungiyar Bayern Munich ta kara azama a sayan dan wasa Lucas Hernandez a farkon shekarar 2019, inda ta zuba zunzurutun kudade na Euro miliyan 80 don siyo mai tsaron bayan daga kungiyarsa ta Atletico Madrid, wannan ya sa ya kasance dan wasa mafi tsada a kungiyoyin gasar Bundesliga.
Hoto: Getty Images/G. Bouys
Kevin De Bruyne
Kakar wasan Bundesliga ta shekarar 2015/2016 ta soma da cinikin dan wasa mai armashi. Dan wasan mai cike da basira ya bar kungiyar Wolfsburg inda ya koma Manchester City kan kudi Euro miliyan 74. Babu wata kungiya a Jamus da ta taba samun irin wannan kudin a cinikin dan wasa a wancan lokacin. Yanzu De Bruyne ya kasance daya daga cikin fitattun 'yan wasa na gasar Premier.
Hoto: Getty Images/Bongarts/M. Rose
Naby Keita
Kungiyar RB Leipzig ta siyo Keita a kan kudi Euro miliyan 15 daga Salzburg. Sai dai kash! Bai dade ba a Jamus kafin kungiyar Liverpool ta yi wuf da shi a kan kudi Euro miliyan 70. Ba karamar riba ba ce ga Keita.
Hoto: Picture-Alliance/dpa/J. Woitas
Timo Werner
Gwanin zura kwallo a raga na Jamus ya kasance wanda masu horas da 'yan wasa ke rige-rige a kai. Bayern Munich da Liverpool sune a sahun gaba a kungiyoyin da ke zawarcinsa, sai dai kafin ka ce kwabo kungiyar Chelsea ta kamalla cinikin dan wasan kan kudi Euro miliyan 53. Hakika ya taka rawar gani a tsohuwar kungiyarsa ta RB Leipzig inda yanzu ya bar wagegen gibi.
Hoto: picture-alliance/dpa/J. Woitas
Leroy Sane
Jita-jita kan zai koma murza leda a kungiyar Bayern Munich, sai dai a wani yanayi na ba-zata, Sane ya bar kungiyar Schalke na Jamus zuwa Manchester City a Ingila a shekarar 2016. Rahotanni sun nunar da yadda aka biya kimanin Euro miliyan 50 a wannan ciniki.
Hoto: Reuters/L. Smith
Granit Xhaka
Dan kasar Switzerland Granit Xhaka ya koma Borussia Mönchengladbach a shekarar 2012, kafin a sayar da shi ga kungiyar Arsenal a kan Euro 45. Ba yabo ba fallasa a rawar da yake ci gaba da takawa a gasar Premier ta Ingila.
Hoto: picture alliance/dpa/Revierfoto
Julian Draxler
A bazarar shekarar 2016 ya bar kungiyar Wolfsburg ya koma kungiyar Schalke, amma jim kadan ya yanke shawarar raba gari da kungiyar. Sai a watan Janairu ya sami biyan bukata, ya koma taka leda a kungiyar PSG ta kasar Faransa kan kudi Euro miliyan 40. Ana ganin Wolfsburg ta tafka asara ganin ta siyo dan wasan a kan Euro miliyan 43.
Hoto: picture-alliance/dpa/P. Steffen
Henrikh Mkhitaryan
Ko mene ne dalilin shugaban kungiyar Borussia Dortmund Hans-Joachim Watzke na zura wa dan wasan idanu? Daga kungiyar Shakhtar Donestsk ya koma Dortmund a kan Euro miliyan 27.5 a shekarar 2013, daga nan aka sayar da dan wasan ga Manchester United a kan Euro miliyan 42 bayan nan ya koma taka leda a Arsenal yanzu an bayar da shi aro ga kungiyar Roma.
Hoto: picture-alliance/dpa/Mueller
Corentin Tolisso
Bayern Munich ta siyo dan wasan tsakiya na Faransa da ke wa kungiyar Lyon wasa, Corentin Tolisso a kan kudi Euro miliyan 41.5 a watan Yunin shekarar 2017. A lokacin shi ne dan wasa mafi tsada da aka taba siyo shi zuwa buga gasar Bundesliga ta Jamus.
Hoto: picture-alliance/Ansa/A. Di Marco
Roberto Firmino
A cikin kankanin lokaci dan Brazil Roberto Firmino ya kasance dan wasa a gasar Bundesliga mafi tsada. A shekarar 2015, Liverpool ta biya Hoffenheim Euro miliyan 41 a cinikin dan wasan. Ga dukkan alamu hakar ta cimma ruwa ganin jerin nasarorin da kungiyar ta samu sai a ce Firmino ya ci kudinsa.
Hoto: picture alliance/GES-Sportfoto
Javi Martinez
Bayern Munich ta zuba Euro miliyan 40 don siyan Javi Martinez daga Athletic Bilbao. Bayern ba ta yi nadama ba, don kuwa Martinez ya taimaka wa kungiyar a nasarorin da ta samu a lashe gasar Bundesliga sau da dama.
Hoto: imago/Team 2
Hotuna 121 | 12
An kaddamar da gasar Bundesliga ta 'yan rukuni na biyu a karshen makon da ya gabata, inda tuniaka fara fafatawa tsakanin kungiyoyin da ke neman zama zakara. A wasannin da aka kara a makon farko Shalke O4 ta doke Hertha Berlin da ci biyu da daya, yayin da Darmstadt ta casa Bochum da ci hudu da daya. Karlsruher ta doke Penssen Münster da ci uku da biyu, kana Paderborn ta yi nasara a kan Holstein Kiel da ci biyu da daya. Elversberg ta doke Nüenberg da ci daya mai ban haushi, haka kuma Arminia Bielefeld ta yi wa Fortuna Düsseldorf kisan mummuke da ci biyar da daya.
Cinikin 'yan wasa mafi tsada a Bundesliga
Daga Bundesliga zuwa Premier League, shahararren dan wasa Florian Wirtz ya sauya sheka daga Bayer Leverkusen zuwa FC Liverpool a kan kudi Euro miliyan 150, ya zama dan wasa mafi tsada da aka sayar a Bundesliga.
Hoto: Gladys Chai von der Laage/picture alliance
Omar Marmoush - Ero Miliyan 75
Kasuwa ta bude ga Eintracht Frankfurt! A lokacin bazara ta shekara 2023 dan kasar Masar din da ya ke da kwantirage da abokiyar hamayya VfL Wolfsburg, ya sauya zuwa kungiyar ta Hasee a kyauta. Shekara guda da rabi bayan komawarsa, Frankfurt ta sayar da shi a kan makudan kudi Euro miliyan 75 da yiwuwar samun karain garabasa ta Euro miliyan biyar ga kungiyar kwallon kafa ta Manchester City.
Hoto: imago images/Jan Huebner
Kevin De Bruyne - 76 Millionen Euro
Bayan an amince da sayar da shi a kan kudi Euro miliyan 76, shararren dan wasan na VFL Wolfsburg ya amince da sanya hannu a kan kwantiragi da kungiyar kwallon kafa ta Manchester City a bazarar 2015. Koda yake kungiyar ta VW ta samu makudan kudi bayan sayar da dan wasan, amma za a yi kewar yadda De Bruyne ya taka leda a kungiyar ta 'Wolves'.
Hoto: Getty Images/Bongarts/M. Rose
Lucas Hernandez - Euro Miliyan 80
Ya kasance dan wasa mafi tsada a tarihin FC Bayern Munich. A lokacin bazarar shekara ta 2019 Bayern ta sayi Lucas Hernandez a kan kudi Euro miliyan 80. A lokacin ya lashe kofin duniya da kasarsa Faransa a shekara ta 2018, Bayern Munich ta sayo shi daga kungiyar Atletico Madrid. Ya kasance dan wasa mafi tsada da aka saya a Bundesliga, kana dan wasan baya mafi tsada a duniya.
Hoto: Stefan Matzke/sampics/picture alliance
Jadon Sancho - Euro MIliyan 85
Daga Bundesliga zuwa Premier League: Bayan cimma yarjejeniyar Euro Miliyan 85, dan wasan dan asalin kasar Ingila mai shekaru 21 a duniya a wancan lokaci ya sauya sheka daga kungiyar Borussia Dortmund ta Jamus zuwa Manchester United ta Inglia a bazarar 2021. Ciniki mai kyau ga BVB, shekaru hudu bayan da ta sayi dan wasan a kan kudi Euro Miliyan bakwai da dubu 500 daga kungiyar Manchester City.
Hoto: Mario Hommes/DeFodi Images/Getty Images
Josko Gvardiol - Euro Miliyan 91 da dubu 500
Ya kasance dan wasa baya na tsakiya, sai dai kwallon da ya ci ya sanya dan wasan kasar Kuroshiya ya dauki hankalin Pep Guardiola. Gvardiol ya ci kwallo a gasar zakarun Turai a watan Fabarirun 2023 ga kungiyarsa ta RB Leipzig a fafatawarsu da Manchester City da Guardiola ke horaswa. Watanni shida bayan kammala gasar, kungiyar ta Ingila ta saye shi ya zama dan wasan baya mafi tsada a duniya.
Hoto: Christian Schroedter/IMAGO
Randal Kolo Muani - Euro Miliyan 95
Ana dab da rufe hada-hadar cinikin 'yan wasa Bafaranshen ya bar kungiyarsa ta Eintracht Frankfurt a 2023. Ya kasance dan wasan da ya fi cin kwallaye a kakar Bundesliga, inda ya ci kwallaye 15 ya uma taimaka an ci 16. Duk da sayen sa a kan kudi Euro miliyan 95, kungiyarsa ta Frankfurt ba ta yi wani farin ciki ba. An saye shi jim kadan bayan rufe cinikin 'yan wasa a Jamus, babu damar yin ciniki.
Hoto: Arne Dedert/dpa/picture alliance
Harry Kane - Euro miliyan 95
Bayan dogon cinki, maciyin kwallo a gasar Premier League ya koma FC Bayern, bayan kwashe tsawon lokacin kwallonsa a kungiyar Tottenham Hotspur. Kyaftin din kungiyar kwallon kafa ta Ingila, ya kasance dan wasa mafi tsada da aka saya a tsawon sama da shekaru 60 na tarihin Bundesliga a kan kudi Euro miliyan 95.
Hoto: Richard Heathcote/PA/picture alliance
Kai Havertz - Euro Miliyan 100
Kungiyar kwallon kafa ta Chelsea ta yi cinikin dan wasan nan take a kan kudi Euro miliyan 80, a 2020. An sayi dan wasan mai shekaru 21 a wancan lokaci Kai Havertz daga Bayer 04 Leverkusen ta Jamus. Cinikin ya kai Euro Miliyan 100, ta la'akari da abin da ke da alaka da kwazonsa. Kwalliya ta biya kudin sabulu, domin a 2021 dan wasan dan kasar Jamus ya jagorance su lashe kofin zakarun Turai.
Hoto: picture-alliance/dpa/M. Meissner
Jude Bellingham - Euro Miliyan 113
Bayan kwashe shekaru uku a Borussia Dortmund, dan kasar Ingilan ya koma Real Madrid a 2023 tare da saka hannu kan kwantirage zuwa 2029. Kudin cinikin da aka biya wani bangarensa ga kungiyarsa ta Birmingham City FC, zai karu daga baya ta hanyar garabasa zuwa Euro miliyan 113 kamar yadda kasuwar cininkin 'yan wasa ta 'transfermarkt.de' ta sanar.
Hoto: Martin Meissner/AP/picture alliance
Ousmane Dembélé - Euro Miliyan 135
A 2017 FC Barcelona ta sanya Euro miliyan 105 a asusun Borussia Dortmund, domin sayen Ousmane Dembélé. Kudin sun karu zuwa Euro miliyan 135 million, sakamakon garabasa da ya samu. Tun asali Dembélé da bai kasance dan wasa mai dadin sha'ani ga an saye shi ne a kan kudi Euro miliyan 14. A watan Disamba na 2023, Dembélé ya koma kungiyar Paris St. Germain tare da lashe kofin zakarun Turai a 2025.
Hoto: picture-alliance/dpa/G. Kirchner
Florian Wirtz - Euro Miliyan 150
A cinkin da ya kafa tarihi na kudi Euro miliyan 150, guda cikin kwararrun 'yan wasan Jamus ya sauya sheka. Maimakon ya koma FC Bayern da kila za ta so ta saye shi saboda kwarewarsa wajen iya sarrafa kwallo, Wirtz ya zabi ya koma kungiyar FC Liverpool ta Ingila. An dai saye shi a kan kudi Euro miliyan 125, inda za a rinka biyansa albashin Euro miliyan 12 zuwa 15 a shekara.
Hoto: Sebastian El-Saqqa/firo/picture alliance
Hotuna 111 | 11
Har yanzu muna fagen kwallon kafa, inda a jajibirin fara gasannin lig-lig na Turai hada-hadar cinikayyar 'yan wasa na ci gaba da kankama a tsakannin kungiyoyin kwallo kafa da ke kokarin yin damara domin tunkarar kakar wasa mai zuwa. Tottenham ta Ingila, na zawarcin dan wasan gaba na Real Madrid kuma dan kasar Brazil Rodrygo Silva de Goes domin maye gurbin dan wasanta Son Heung-min mai shekaru 33. Manchester United na kokarin danne Newcastel, wajen cefano dan wasan gaban RB Leipzig ta Jamus Benjamin Sesko. Chelsea ta yi babban kamu na cefano dan wasan baya na Ajax Amsterdam Jorrel Hato a kan fam miliyan 37. A laligar kasar Spain kuwa ana kila wa kala kan yi wa 'yan wasan Barcelona biyar rijista, domin taka wa kungiyar leda a kakar wasa mai zuwa. 'Yan wasan sun hada da Marcus Rashford da Joan Garcia da Roony Bardghji da Wojciech Szczęsny da kuma Gerad Martin. Kungiyar da ke rike da kofin laliga ta ce, tana iya kokari domin bullo wa wannan lamari kafin karshen wannan mako.
Bai wa matasa kuzari ta hanyar wasan kwallon Kwando a Gabon
03:31
This browser does not support the video element.
Tawagar 'yan matan Najeriya ta lashe kofin gasar kwalon kwando ta nahiyar Afirka, wadda aka kammala a birnin Abidjan fadar gwamnatin Cote d'Ivoire. A wasan karshe da aka fafata a Lahadi uku ga wannan wata na Agusta da muke ciki, 'yan matan na Najeriya sun tumurmusa takwarorinsu na Mali da ci 78 da 64. Wannan nasara da tawagar 'yan matan Najeriya ta samu na zama cikon wasanni 29 na kwallon kwando da take bugawa a nahiyar Afirka ba tare da an doke ta ba, tun bayan rashin nasara da ta yi a birnin Yaounde na Kamaru a wasan neman matsayi na uku na gasar cin kofin Afirka a watan Oktoban 2015.
