Gawar Fafaroma Francis ta isa cocin St. Peter's Basilica bisa rakiyar manyan limaman darikar Katolika, inda kiristoci mabiya za su yi ta'aziyyarsu ta karshe kafin jana'izarsa da za a gudanar a ranar Asabar, wacce za ta samu halartar shugabannin kasashen duniya da dama. Sai dai sabanin yadda al'ada cocin ta tanada, an kwantar da gawar shugaban darikar katolika ta duniya a kasa kamar ya bukata, inda ya yi fatan samun jana'iza mafi sauki.

Karin bayani: Akwai fata kan samun Fafaroma daga Afirka

Ana sa ran dubun-dubatar mutane ne za su karrama Fafaroma Francis a tsawon kwanaki uku, kamar yadda ya faru lokacin jana'izar Fafaroma Benedict XVI a  2022, inda mutane 200,000 suka yi ban kwana da shi kafin a binne shi. Sai dai domin tinkarar kwararar al'umma, hukumomi sun tanadi mataki shingen karfe na hana zirga-zirgar maziyarta, da kara yawan motocin bas da ke hidima a fadar Vatican, da kuma karfafa matakan tsaro a kofofin shiga dandalin St. Peter.

Karin bayani: Fafaroma ya rasu bayan ya yi fama da doguwar jinya

Kamar yadda ya faru a shekarar 2005 a lokacin jana'izar John Paul II, da dama daga cikin shugabannin kasashe da sarakuna za su halarci jana'izar shugaban cocin Katolika, wanda zai gudana cikin tsauraran matakan tsaro a ranar Asabar.