Hukumomi a ƙasar Ghana sun tsare a ƙalla yan ƙasar China 166, waɗanda ke aikin haƙar Gold a ƙasar ba bisa ƙa'ida ba. Ofishin jakadancin ƙasar China a Accra da ya fidda sanarwar, ya ruwaito cewa, 'yan sanda sun kama mahaƙa daga ƙasar China kimanin 124 a yankin Ashanti, kana an kama wasu 42 a yankunan tsakiya da yammacin ƙasar. Kuma yanzu mahaƙan ma'adinan da aka kama an turasu birnin Accra inda ake tsare da su a babban birnin ƙasar. Kakakin jami'an shige da ficen ƙasar Ghana, Farancis Paldetti, yace wannan yana daga cikin ayyukan hukumar aiki da cikawa, wanda gwamnatin ƙasar ta kafa domin shawo kan matsalar masu haƙar ma'adinai bisa haramtattun hanyoyi. A watan jiya ne dai shugaba Dramani Mahama, ya kafa wata hukumar aiki da cikawa da za ta magance matsalar haramtattun masu haƙar ma'adinai, waɗanda shugaban yace suna ci gaba da haddasa zaizayar ƙasa, da kuma lalata mahalli.

Mawallafi: Usman Shehu Usman
Edita: Umaru Aliyu