Manyan 'yan takara a babban zaben Amurka na kace-nace kan batun bakin haure da 'yancin mata, a daidai lokacin da aski yazo gaban goshi a gangamin yakin neman zaben kasar da za a gudanar nan da kwanaki biyar masu zuwa. Kamala Harris ta jam'iyyar Democrat, ta ja daga da abokin karawarta da ke neman kome kan kujerar mulki ta fadar White House Donald Trump, kan muhimman batutuwan da ke yamutsa hazo a gangamin yakin neman zabe a yayin tarukan da suka gudanar na samun kaso mafi rinjaye na masu kada kuri'a a manyan jihohi. A Nevada da ke kudanci, 'yar takara Kama Haris ta caccaki abokin hamayarta Donald Trump, tare da jaddada manufofinta na kara inganta hakkokin mata musamman ma batun zubar da ciki, a yayin da Donald Trump ya ci gaba da mayar da martani a gangaminsa na jihar Arizona.