Matashiyar mai suna Saratu Sulaiman mai Kaset ta ce ta fara kasuwancin ne tun tana aji uku na karamar sakandare a shekarun 2012, kuma karancin masu wannan sana'a ta kitso da kunshi da ta lura akwai na daya daga cikin abubuwan da suka kara jan hakalinta ga wannan sana'a. Matashiyar dai ta bayyana irin yadda sana'ar tata ke kara samun tagomashi da bunkasa, bayan da mutane suka fahimci yadda take gudanar da harkokinta a zamanance.

Koda yake bayan shafe dogon lokaci sannu a hankali kan sana'ar, matashiyar ta ce ta samu rufin asiri sai dai kuma akwai tarin kalubale da take ganin suna mata tarnaki wajen cimma burinta. Baya ga gwamman mutane da matashiyar ta koyawa sana'ar, akwai tarin masu taya ta gudanar da sana'ar a yanzu. Daga karshe dai matshiyar ta ce burinta shi ne koyar da daruruwan matasa sana'ar tata.