Hukumar Unicef ta nemi gudummawar masu gidan rana
January 24, 2006![](https://static.dw.com/image/1435681_800.webp)
Ya zuwa yanzu dai asusun tallafawa kana nan yaran na Mdd, yace yana neman gudummawar dalar Amurka miliyan 805 ne don tunkarar wasu matsaloli da suka danganci yara a kasashe daban daban na duniya.
Hukumar ta Unicef, ta tabbatar da cewa a yanzu haka akwai matsaloli 29 da yara ke fama dasu a kasashe daban daban na duniya, wadanda suke bukatar taimakon gaggawa.
Babban batu da zata fi mayar da kai wajen kashe wadannan kudade idan an samu a cewar hukumar ta Unicef, sun hadar da samar da abinci mai gina jiki da kyakkyawan ruwan sha da kuma ingantaccen ilimi ga yara kana nan a kasashe daban daban na duniya.
Faruwar wadannan matsaloli ga yaran a cewar babban dakartar hukumar, wato Ann Veneman ya samo asali ne a sakamakon ci gaba da faruwar rikice rikice a wasu kasashe a duniya a hannu daya kuma da cututtuka da rashin abin ci mai gina jiki.
Daga cikin jumlar kudaden da hukumar ta nema, tace zata kashe a kalla miliyan 331 ne gada yawa daga cikin yara a kasar Sudan, wadanda rikice rikicen yankin Darfur ya jefa a cikin hali na kaka ni kayi.
Rahotanni dai sun nunar da cewa a yanzu haka akwai yara kusan miliyan daya da digo hudu da rayuwar su ke cikin mawuyacin hali a kasar ta Sudan a sakakamon rikice rikice da tashe tashen hankula dake ci gaba da wanzuwa a yankin na Darfur.
Ya zuwa yanzu a cewar hukumar ta Unicef, ako wace shekara yara masu shekaru kasa da biyar ne kusan dubu dari a kasar ta Sudan suke rasa rayukan su daga wasu cututtuka da za´a iya maganin su.
Ba a da bayan kasar ta Sudan , hukumar ta Unicef take akwai kuma daruruwan yara dake cikin garari a wasu kasashen dake gabashi da kuma kudancin nahiyar ta Africa.
Har ila yau, akwai kuma yara da yawa da a yanzu haka ke fuskantar barazana a wasu kasashe na tsakiya da gabashin turai, a sakamakon kana nan rikice rikice da kuma bala´oi iri daban daban daga indallahi.
Bugu da kari, hukumar ta tallafawa kana nan yaran ta tace a kudanci da gabashin yankin Asia ma akwai miliyoyin yara da yunwa kewa barazana, sakamakon faruwar fari da tsunami. Sannan a hannu daya ga rashin kyakkyawan muhalli da kuma abubuwan more rayuwa da yaran ke fuskanta.
A karshe rahoton na Unicef ya kuma tabbatar da cewa rikici dake ci gaba da wanzuwa a tsakanin Israela da Palasdinawa na dada jefa kana nan yara na yankin cikin mawuyacin hali na rayuwa.