Gwamnatin Isra'ila ta ce ta kai harin ne a matsayin ramuwar gayya kan hare-haren da ƙungiyar Hezbollah ta kai arewacin Isra'ila, yayin da Firaminista Benjamin Netanyahu ya jaddada cewa ƙasarsa za ta ci gaba da matsa lamba har sai ta tabbatar Hezbollah ba ta zama barazana ba.

Sai dai Iran ta yi kakkausar suka kan harin, tana zargin Amurka da bai wa Isra'ila damar ci gaba da kai hare-hare a Lebanon duk da ƙoƙarin sasanta rikicin. Kakakin majalisar dokokin Iran Mohammad Bagher Ghalibaf ya yi gargadin cewa ci gaba da harin da kuma matakan takunkumin Amurka kan Iran na iya sa sansanonin Amurka da kadarorin Isra'ila a yankin su zama halastattun wuraren mayar da martani.

Wannan na zuwa ne yayin da ake ci gaba da ƙoƙarin yarjejeniyar rage tashin hankalin da ke tsakanin Iran, Isra'ila da kuma Hezbollah, duk da cewa rikicin na ci gaba da barazana ga zaman lafiyar yankin Gabas ta Tsakiya.