Iran ta yi watsi da yarjejeniyar nukiliya
January 6, 2020
Wannan dai yarjejeniya ce da manyan kasashen duniya shida ciki har da Jamus suka cimma a shekara ta 2015, koda yake daga bisani Amirka ta janye.
Tashar talabijin mallakin Iran din ce ta sanar da hakan bayan gwamnatin Iran din ta tabbatar da wannan matsayi.
Hankali dai ya tashi a Iran da wasu kasashen Gabas ta Tsakiya, bayan kisan kwamandan mayakan Iran Qasem Suleimani da Amirka ta yi a Bagadaza ranar Juma'ar da ta gabata.
Dubban daruruwan mutane ne dai suka tarbi gawar marigayin kwamandan mayakan na Iran Qasem Soleimani, gabanin gangamin addu'o'i na kasa da aka yi a wannan Litinin, yayin da a ranar Talata ake shirin yi masa jana'aiza.
A share guda, wasu rahotanni sun tabbatar da kai hari kan ofishin jakadancin Amirka da ke Bagadazar Iraki, bayan kiran janye dakarun Amirkar da kasar ta yi.