Tun kafin a kai ga jin abin da shirin shugaban Amirka Donald Trump na lalubo hanyar warware rikicin yankin Gabas Ta Tsakiya zai kunsa, Falasdinawa suka yi watsi da shi, inda suke ganin babu wani abun a zo a gani face baiwa Isra'ila wata sabuwar damar kara mamaye musu yankin zirin Gaza.

Falasdinawan dai sun shirya yin wani bore a ranaikun Talata da Laraba. Firai Ministan Isra'ila Benjamin Natenyahu ya sha jaddada aniyarsa ta mallaka wa Isra'ila garuruwan kama wuri zauna na Yahudawa a yammacin Kogin Jordan da Isra'ila ta mamaye.