Babban hafsan sojin Isra'ila Laftanar Janar Eyal Zamir ya sanar da sallamar wasu manyan jami'an sojin kasar tare da ladabtar da wasu game da gazawar su wajen hana aukuwar harin ranar 7 ga watan Oktoban 2023 da Hamas ta kai.

A cikin wata sanarwa rundunar sojin ta tabbatar da sallamar sojojin tana mai cewa ba za a sake daukar su aikin soji ba.

Wadanda aka sallama daga aiki sun hada da tsoffin shugabannin hukumar leken asiri da shugabannin sashen gudanarwa na sojin wadanda dukkaninsu sun yi ritaya a baya amma kuma suna ci gaba da zama kan mukamansu.

Matakin ladabtarwar ya biyo bayan matsin lamba daga al'ummar kasar da ke bukatar a gudanar da bincike. Gwamnatin Firaminista Benjamin Netanyahu kawo yanzu ba ta kaddamar da binciken harin ba.

Dubban jama'a sun bi sahun gangamin 'yan adawa a birnin Tel Aviv suna kira a kafa kwamitin bincike na kasa.