Kramp-Karrenbauer ta gaji Merkel a jagorancin CDU
December 7, 2018![Deutschland CDU-Parteitag in Hamburg Kramp-Karrenbauer und Merkel](https://static.dw.com/image/46636806_800.webp)
Talla
Wakilan jam'iyyar CDU mai mulkin Jamus sun zabi Annegret Kramp-Karrenbauer a matsayin wadda za ta gaji Angela Merkel a jagorancin jam'iyyar.
Annegret Kramp-Karrenbauer, wacce babbar ta hannun damar shugabar gwamnati Angela Merkel ce ta ci zaben da aka yi a birnin Hamburg ne da kuri'u 517.
Daga cikin kuri'u 999 da wakilan jam'iyyar suka kada, hamshakin attajirin nan kuma lauya, Friedrich Merz, shi ne ya zo na biyu da kuri'u 482.
Ministan lafiya Jens Spahn, wanda ya zo na uku a fafatawar, ya fita ne a zagayen farko na zaben wanda aka yi a wannan Juma'a.
Nasarar zama jagora a jam'iyyar CDU, na nufin damar samun shugabancin gwamnatin Jamus ke nan bayan shugabar gwamnati Angela Merkel ta sauka daga karagar mulki a shekara ta 2021.