A baya dai Jamus din ta tura sojojinta, inda suka taka rawa a cikin rundunar taron dangi karkashin jagorancin Amirka, ta hanyar zuba mai a jiragen yaki da kuma bayar da horo ga dakarun sojan kasar Iraqi. Wannan tsarin dai da Jamus din ke ciki na zuwa karshe ne a watan Oktobar wannan shekarar. Babban wakilin Amirka a Siriyan James Jeffrey ne dai ya bukaci Jamus din da ta tura sojojinta na kasa domin su maye gurbin na kasarsa da ke shirin kammala ficewa daga Siriyan baki daya.