Littafin ya yi waiwaye kan abin da Angela Merkel ke tunawa lokacin mulkinta wanda aka yi wa suna "Yanci" ya bayyana a cikin harsuna 30 na duniya, inda zai zagaye manyan shagunan litattafai na kasashe da dama ciki har da kasar China. A kasar Jamus, tikitin shiga zauren da za a nuna littafin ya samu tagomashi a birin Berlin, domin an saye dukkanin tikitin, abin da ke nuna yadda har kawo yanzu Angela Merkel na da farin jini wajen Jamusawa.

Karin bayani : Merkel: Waiwayen baya da tsokaci kan Putin da Trump

Littafin mai adadin shafuka 736, a ciki Angela Merkel ta yi waiwaye daga shekarar 1954 zuwa shekara ta 2921, kama daga yanayin rayuwarta a tsohuwar kasar Jamus ta Gabas da sake hadewar Jamus ta Gabas da ta Yamma da fadi tashinta na siyasar Jamus tun daga lokacin har zuwa abubuwan da suka faru a mulkinta na shekaru 16. Don haka aka saka wa littafin suna "Yanci" Tunawa daga shekara 1954 zuwa 2021, an kuma fassari shi a cikin harsuna da ma na duniya. Baya ga haka, an dade ana shirya rangadin da Angela Merkel mai shekaru 70 da haihuwa za ta yi a manyan biranen Turai.

Karin bayani : Jamus ta karrama Merkel da lambar yabo

Gabanin kaddamar da littafin, wasu jaridu da mujallun Jamus sun tsegunta abubuwan da ya kunsa, kama daga batun yake-yake da rigin-gimun da duniya ke fiskanta tun daga yankin Gabas ta Tsakiya zuwa yakin Ukraine da Rasha, sannan kuma jaridun sun ce a cikin littafi, Angela Merkel ta bayyana huldarta da Donald Trump a wa'adin mulkinsa na farko a tsakanin 2017 zuwa 2021, da kuma yadda mazaje suka mamaye siyasar kasar Jamus, da cece-kucen da ya shafin karbar ‘yan gudun hijira a kasar, da kuma yadda huldarta ta kasance da Shugaban Rasha Vladimir Putin.