Jamus ta tallafa wa 'yan Siriya da kudi
March 14, 2019![Brüssel Syrien-Geberkonferenz | Federica Mogherini, EU-Außenbeauftragte](https://static.dw.com/image/47906923_800.webp)
Jamus ta sanar da tallafin kudi miliyan dubu daya da 440 na Euro ga 'yan gudun hijirar Siriya, yayin da Kungiyar Tarayyar Turai za ta bayar da miliyan dubu biyu 2 don cetosu daga mummunan halin da suka shiga. Wakilan kasashe da hukumomin na Turai su yi wannan alkawari ne a lokacin taron ministoci na taron bada tallafi ga Siriya da ke gudana a birnin Brussels na Beljiyam. Ita ma gwamnatin Birtaniya ta kudiri aniyar bayar da kwatankwacin Euro miliyan 464 ga Siriya, yayin da Ostiryia za ta bayar da miliyan 9 na Euro.
Majalisar Dinkin Duniya ta kiyasta bukatar miliyan dubu biyar da 500 don taimaka wa 'yan Siriya miliyan biyar da dubu 600 da ke tsugune a Turkiya da Lebanon da Jordan, da Iraki da kuma Masar. Sannan tana bukatar dala miliyan dubu uku da 300 ga 'yan Siriya da gudun hijira a kasarsu. A makamancin irin wannan taro da ya gudana a shekarar da ta gabata dai, yawan kudin da MDD ta samu don taimaka wa 'yan gudun hijirar Siriya ya yi kasa da abin da ta bukata tun da farko.